شعر و أدب
الوحيد
موگتلي الوحيد انته؟
موگتلي الوحيد انته
وابد غيرك ولا اقبل؟
مشيت ودمعه بعيوني،
گلتك لا حبيبي أرجوك لاترحل
مشيت وتدري ما اﮔدر
انا بلايك شتحمل؟
وگفت ابعيد وتعاين
شفتني اشلون أتولول؟
شفتني اشلون أنا
المذبوح مثل الطير أتوسل؟
شفتني اشلون انا بحبك
چنت مجنون ومخبل؟
شفت ذليت الك روحي
عشان اتكون المدلل
نسيت اشلون من تفرح؟
نسيت اشلون اموتنلك
عشرموتات من تزعل
نسيت اشلون اعوف الكون و
بس بيك انته اتغزل
وينك ياعزيز الروح
ماترجع وسط گلبي
ابليالي الشوگ تتعلل
يا من شوگك عمه عيوني
ضيّعت الطريق وبعد ما اندل
جفيت وفرگتك تچوي
وانا بنيران هجرانك
ساعه أنطبخ،ساعه انذل
ليش اسأل عليك الناس كلهه
وانته ما تسأل؟
شنوقصدك تموتني؟
أبشرك مـيـّت ومنشل
حـِسبتك سنبلة روحي
اثاريك اطلعت منجل
اثاريك اطلعت منجل
فاضل الاحوازي…نموت ويحيى الوطن
