شعر و أدب

عليا البطلة الأحوازية

 إسمع هذا المقطع وارجع

فکر واکتب واحسب واجمع

کل افکارک

رکزوتماشه اویه القصه

لا مو قصه!

صفحه اِمن ِ التاریخ اتلعلع

بسِّ التاریخ امجافیها

*** والله ابن ادم لما یسمع

هذا المقطع

لازم یوگف، ویکبر

ویعود ایفکر

لیش التاریخ امعادیها…؟!!!

ویخلي التاریخ اگباله

ویسأل : یا تاریخ اشمالک

صایر بید الظالم آله

تنسه و تتناسه ویشرونک

وتغیِّر کل مقطع لونک

ما تخجل لمّـا ایسألونک

لیش أجمل صفحه امغطیها؟!!!

*** تنسه العلیا البطلة الأحوازیه، اشلون؟!!!

اشلون العلیا اعلیک اتهون

العلیا و بت سلمان الکعبي

و یا سلمان ؟

الهز الکون!

سلمان الکعبي الأسطوره

الکوّن أکبرو اعظم دوله

منِّ البصرة الحد بوشهر الحد البحر

وسد کارون … السده ابعزمه

وگالو یشبه سد اسکندر

السد الأجج نار الحقد ابگلب اکریـِّم

خان الزند

الهد و هدّم ذاک السد

——— سلمان الکعبي الأسطورة

الصد العدوان ابإسطوله

عدوان امثلث مجنون

ابریطاني و زندي وعثماني

اتحدوا ، هدّوا

صدهم ، ردهم

ردّوآ، هدّوآ، دکوآ بمدافعهم

قلعة سلمان المعروفة

وسلمان ایعاین بعیونه

والطوفان ابصدره ایفور

ویشوف القتلی البصفوفه

ویشوف ارجاله عله الگاع

اسباع انسور ابدمها اتخور

ولا ظل اسلاح ولا میره

واحترگت بالنار الدیره

وظل سلمان الطود ابحیره

———— وضاگ ابسلمان المیدان

ونادى ارجال المجلس گال:

المجلس وین المجلس وین

لازم یتشکل بالحال

ودار الشور وگام ایدور

ایدور اعله الماهو مقدور

وگالوا: احنه

الچنه اعلی العدوان اندور

دار الیوم اعلینه الدور

نستسلم؟ لا، ما نستسلم

لا ، نستسلم

لا، ما نستسلم

لا ما نستسلم للزور

وسلمان ایعاین بعیونه

والطوفان ابصدره ایفور

عین الشعبه وعین الربه

یا ربِّ احفظ هاي الدیره

یاربْ ضاگت ، وحنه ابحیره

——- وگال المجلس بعد الشور:

ماکو غیر الإستسلام

و ما أعظم محنة سلمان

وعاین سلمان المقدام

وگال الهم:

ها .. إي … لا.. ها… اي یا إخوااااان

—— ودشت علیا اعلی الدیوان

و وُگفتْ بالباب الکعبیة

وُگفتْ ، وَگفة ْ

نخلتنا العیطه العربیة

وُگفتْ مثل الزانه الترعد

والسیف ابیمناها ایعربد

العلیا التتمناها الدنیا

بنت النعمة وعاشت ما بین النیران

عاشت دنیا او کلها احروب

اتعطر شیلة علیا الحرب

بریحة بارود او دخان

العلیا اجتمعت بیها

الحشمه، الحکمه ، الغیره

ونقمه اعلی العدوان

بنت الشیخ

الما یخلف شور الها الشیخ

قرة عینک یا سلمان

—- وگفت گالت : حیا الله ارجال الکعبیة

وفیتو وکفـّیتو لاچن

ما ترضی الغیره العربیه

نستسلم وانروح اضیاع

نتشرد وتضیع الگاع

اشلون اتشوفون الکعبیه

تاخذها اعداکم مسبیه؟!!!

——– ومدت علیا

الإید المحزمها او رُفعتها:

هاکم هاي الشیله اخذوها

و لو متّ وصار اتدفنوني

ابهاذي الچفیة اتلفوني

————— وطلعت علیا امن الدیوان

اتصیح وترکض مثل اللبوه

للبوابة وللمیدان

وچني ویاها، امحزم وارکض

خطوه ابخطوه

انصیح ابصوت : الموت الموت العزَّه اترید

الموت الموت

اربوع اربوع العزة اربوع

وما نرکع للذلّ ارکوع

ابدال الجسر انمدّ اضلوع

انسوي الهاجم حدنا اخذمّ

نشعل نار امن العادانه انرید الثار

ثار الما نامو عل همّ

ثار الطلبوا حگ او لحگوا

ما ناموا لیل او ما بگوا

تاریخ ابدم لجلک کتبوا

هاي افعال امتنه الطیبة

خسران العادانه اویندم.

————– ونسمع صوت….

وثار الصوت الهـَزّ الگاع

ما تنضم الگاع البیها ارجال اسباع

کعب انتهضت

کعب انتفضت

صاحت عامر

عامر عامر عامر عامر عامر…

———— کعب انتصرت

کعب انتصرت

*** الدكتور: عباس العباسي الطائي

المصدر: الصفحة الشخصية للدكتور عباس الطائي في الفيسبوك

تذكير تم استخدام التسمية الصحيحة لوطننا الأحواز بدلا من ال" ا ه و ا ز" أيمانا منا بصحتها

 

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *