شعر و أدب

#أحوازنا -قصيده الملحمه/الشاعر يونس الصرخي

دخلنه ابمعركه اتوسطه ملك الموت

تحيزنه المگابر ويه اهاليهَ

تلگه العنده راس ابراسه نابت غيض

صحرا وعل جماجم گمنه نمشيهه

انچفه کاس الصبر وتأخر اصرافیل

الماصدگ حچینه ایشوف ننهیهه

عرب !تدري العرب لو لبط عرج الثار

تذب ارواحها ابذبت چفافیهه

من انصک ادینه اتحل حلگهه الگاع

تدري اشخیرنه وشراح نگیهه

التهلهل للفزع تخلط دمه وبارود

الما طایح ولدهه ابخجل تلگیهه

تصرخ لایرد ..لو ما املطخ موت

ماشوف المهر ویاهه راعیهه

طگ ..طبل الذبوح ودردم ابن الهور

امزاود وي رطین الفشگ نگضیهه

نتحسر وجه اعدانه منغتاض

التلاگینه جثث بس روس مابیهه

من انطگ رجلنه ..ایطگ ضلع بلگاع

الحرب خلطت زلم ولموت صافیهه

الع.تک یاوطن لو نشد سرج الخیل

الملاحم یمنه فشله اتجیب طاریهه

المات الأجل ارضه …ابعرضه اثر قرآن

الیحسب گاع اخته اشلون یطیهه

وبس احنه انعرف حچی السواتر حیث

من اتجیس بینه انجیس سرگیهه

الچیله ابصدرا شایل.. عدنه شایل نوط

وبچفوف المنایه العلگت بیهه

من اصهیل مهره انمیز الفزاع

ونعرف الشارده امناثار رجلیهه

نحط بلگوس سهمین وفرد نیشان

النصیبه وروحه تطلع عیب نخطیهه

هذول احنه الأحوازیین من نغتاض

نفصل اچفانه ولحجه نلقیهه

الشاعر یونس الصرخي

المصدر: موقع "انا مثقف

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *